Нэртэй хөлбөмбөгчин, ур чадвартай дасгалжуулагч Дидье Дешам Францын “Марсель” багийн ерөнхий дасгалжуулагчаар томилогдлоо. Өмнөх мэргэжилтэн Эрик Геретс клубийн эзэдтэй хэл амаа ололцоогүйн улмаас өөрийн хүсэлтээр ажлаа өгчээ. “Олимпик” нэрээрээ дэлхийд танигдсан тус баг цагтаа “Аваргуудын лиг”-т түрүүлж байсан.

Тэндээс түүний шинэ үеийн сэргэлт эхэлсэн ч улсынхаа аварга цолыг “Лион”-д долоон жил дараалан алдав. Өрсөлдөгчийнхөө энэ супер цувралыг тасалдуулах боломж Марсель хотынхонд ирээд буй чухал үед Геретс огцорсонд олон хөгжөөн дэмжигчид ундууцаж байлаа.

Гэхдээ тэд хэдэн хоногийн дараа тайвширсэн. Учир нь шүтээн нь болсон Дешам ерөнхий дасгалжуулагчийн ажлыг хүлээн авчээ. “Марсель”-ийг “Аваргуудын лиг”-т түрүүлдэг жил багийнхаа ахлагчаар ажиллаж байсан тэрбээр “Монако” болон “Юве”-г амжилттай удирдан шилдэг дасгалжуулагч болох ирээдүйтэйгээ харуулсан билээ. Дешам 2000 онд спортоо орхиод 2001-2005 онд “Монако”-г удирдсан. Энэ хугацаанд багаа Францын цомын аварга болгож, “Аваргуудын лиг”-ийн хагас шигшээд шалгаруулсан.

Дараа нь “Ювентус”-д очин “Сери-В”-гээс “Сери-А”-д дэвших замыг засч өгсөн билээ. Гэвч Италийн багийн боссуудын үзэл бодолтой нийцээгүй тул тэрбээр тус клубээс явснаар өдгөө хүртэл ажилгүй байсан юм. “Марсель”-ийн ерөнхийлөгч Пап Дисуф хувьцаа эзэмшигчидтэй зөвлөлдөөд түүнд багаа даатгах болсноо өчигдөр мэдэгдэв. Ноён ерөнхийлөгчийн хэлснээр чухам Дешам л ерөнхий дасгалжуулагчийн ажилд яв цав тохирч байгаа гэнэ.