Windows 7 үйлдлийн системийг SSD цул биет дискэнд
зохицуулан оптималжуулсан тухай мэдээ баримтаар баталгаажиж эхэлж
байна. Шинэ үйлдлийн систем SSD-ний олон давуу талыг ашиглаж чадахуйц
боловсронгуй болж чадсан ч хайхрахгүй байх аргагүй зарим дутагдал бас л
үлдсэнийг тус компаний мэргэжилтнүүд тусгай блогдоо хүлээн зөвшөөрчээ. Юун
түрүүн давуу талаас нь дурдвал SSD төрлийн диск нь сонгодог хатуу
дисктэй адилаар соронзон толгой байршуулах ажиллагаанд цаг үрдэггүй
болохоор чөлөөт дурын өгөгдөл унших хурд маш сайн байгаа юм. Мөн SSD
дискний загвараас хамаараад хурдны ялгаа их байгаа боловч ихэнх
тохиолдолд SSD нь дараалсан өгөгдөл уншиж бичихдээ мөн л хурдтай байна.
Харин их хэмжээтэй
жижиг файл бичихдээ хүлээгдэл ихтэй, SSD диск "хуучрах" тусам гавшгай
ажиллагаа нь унаж байгаа дутагдлыг Windows 7 үйлдлийн системд хараахан
шийдэж амжаагүй хэвээр. Энд дурдагдсан эхний дутагдлын шалтгаан нь
SSD-ний санах ойн үүрний ажиллагааны төвөгтэй зохион байгуулалтаас
болдог бөгөөд шинэ мэдээлэл бичих бүрт хуучныг нь эхлээд заавал "арчих"
ажиллагаа хийдгээс болдог. Гэхдээ RAM санах ойн бүфертэй SSD-нд энэ
удаашрал арай бага байна. Intel-ийн үйлдвэрлэдэг SSD
хугацаа өнгөрөх тусам хурд мууддаг нь тодорхой болмогц тус компани уг
таагүй нөлөөг бууруулах тусгай "патч" хүртэл гаргасан боловч нэг мөр
эцэслэн шийдэж чадаагүй хэвээр. Бүтээмж уналт нь дискэнд өгөгдлийн
фрагментац ихэссэнтэй уялдаж үүсдэг боловч дефрагментац хийх нь SSD-г
хугацаас нь өмнө "элэгдүүлдэг" аж. Ийм учраас Windows 7 үйлдлийн
системд SSD-нд дефрагментац хийх фүнкцийг салгаастай байхаар
тохируулжээ. Үүнчлэн
SSD нь ReadyBoost, Superfetch фүнкцийн ажиллагааг удаашруулдгаас болоод
ийм төрлийн дискэнд уг фүнкц салгаастай байхаар үйлдлийн системийг
тохируулсан аж. Мэдээллийг дискэнд бичих ажиллагаа байнга хийгддэг бол
Windows 7 үйлдлийн систем нь SSD-нд өгөгдөл компресслохыг мөн
сайшаахгүй. Харин Windows Search болон Bitlocker фүнкц ашиглан өгөгдөл
шифрлэх ажиллагаа SSD дискэнд асуудалгүй байгаа төдийгүй зарим
тохиолдод уламжлалт хатуу дискнээс хурдтай байна.
|